দলগাঁৱত অসম গণ পৰিষদৰ কৰ্মশালা l অসম গণ পৰিষদৰ এসময়ৰ দূৰ্গ দলগাঁও সমষ্টি পুনৰ উদ্ধাৰৰ লক্ষ্য
আগন্তুক পঞ্চায়ত নিৰ্বাচনত অধিক পঞ্চায়ত দখলৰ লক্ষ্য অসম গণ পৰিষদৰ
২৬ৰ বিধান সভা নিৰ্বাচনত দলগাঁও সমষ্টিত অসম গণ পৰিষদৰ জয় নিশ্চিত
দৰঙৰ দলগাঁও সমষ্টিৰ অন্তৰ্গত পূব দলগাঁও হাই স্কুলত অসম গণ পৰিষদ দলৰ এখনি কৰ্মশালা অনুষ্ঠিত কৰা হয় । অসম গণ পৰিষদ দলৰ এসময়ৰ দূৰ্গ দলগাঁও সমষ্টি পুনৰ উদ্ধাৰৰ বাবে বিগত ৭/৮ মাহ ধৰি কাম কৰি আহিছে যুৱ পৰিষদৰ কেন্দ্ৰীয় সাধাৰণ সম্পাদক জয়নাল আব্দিনে । সেই উদ্দেশ্যে শনিবাৰে জাতি ধৰ্ম নিৰ্বিশেষে সকলোকে একত্ৰিত কৰি এখনি কৰ্মশালা অনুষ্ঠিত কৰা হয় । উক্ত সভাত অসম গণ পৰিষদৰ জেষ্ঠ নেতা অপূৰ্ব কুমাৰ ভট্টাচাৰ্য্য , যুৱ পৰিষদৰ কেন্দ্ৰীয় সাধাৰণ সম্পাদক জয়নাল আব্দিন , জিলা সভাপতি কমলেশ্বৰ বৰুৱা , সম্পাদিকা নিবিতা ডেকা , উপ সভাপতি হবিবুৰ ৰহমান , কৃষক পৰিষদৰ দৰং জিলা সাধাৰণ সম্পাদক ফাইজুল হককে ধৰি দলটোৰ বিভিন্ন পৰ্যায়ৰ নেতা উপস্থিত থাকে ।
দলটোৰ জেষ্ঠ নেতা অপূৰ্ব কুমাৰ ভট্টাচাৰ্য্যই , কয় যে , ধৰ্মৰ নামত গোড়ামী কৰা দলৰ লগত আৰু মানুহ থাকিব বিচৰা নাই , মানুহক লাগে উন্নয়ন । আগন্তুক পঞ্চায়ত নিৰ্বাচনত দলগাঁও সমষ্টিত অধিক সংখ্যক পঞ্চায়ত দখল কৰিব অসম গণ পৰিষদ দলে । আনহাতে অসমৰ মুছলমান সকলৰ উন্নয়নৰ বাবে একমাত্ৰ অসম গণ পৰিষদ দলে কাম কৰি আছে । আগন্তুক ২৬ৰ বিধান সভা নিৰ্বাচনত দলগাঁও সমষ্টিত অসম গণ পৰিষদৰ জয় নিশ্চিত বুলি মন্তব্য কৰে যুৱ পৰিষদৰ কেন্দ্ৰীয় সাধাৰণ সম্পাদক জয়নাল আব্দিনে । উক্ত কৰ্মশালাত ৫ শতাধিক পুৰুষ মহিলা অংশগ্ৰহণ কৰে ।।
