লোকসভাত আজি বহু চৰ্চিত ৱাকফ সংশোধনী বিধেয়ক সন্দৰ্ভত আলোচনা হ’ব। প্ৰশ্নোত্তৰ পৰ্ব শেষ হোৱাৰ পাছতে বিধেয়কখন আলোচনাৰ বাবে কেন্দ্ৰীয় মন্ত্ৰী কিৰেণ ৰিজিজুৱে এই বিল দাখিল কৰিব।
সংসদীয় পৰিক্ৰমা দপ্তৰৰ মন্ত্ৰী কিৰেণ ৰিজিজুৱে এই কথা প্ৰকাশ কৰি কয় যে আলোচনাৰ বাবে ৮ ঘণ্টা ঠিৰাং কৰা হৈছে যদিও প্ৰয়োজনত সময় বৃদ্ধি কৰা হ’ব পাৰে। লক্ষণীয়ভাৱে সংখ্যালঘূ সম্প্ৰদায়ৰ ৱাকফ সম্পত্তিৰ পৰিচালনা আৰু ৰক্ষণাবেক্ষণৰ ক্ষেত্ৰত গুৰুত্বপূৰ্ণ সংশোধনী অনা ৱাকফ সংশোধনী বিধেয়কখনক লৈ শাসক বিৰোধী উভয়ে তৎপৰ হৈ পৰিছে।
ৱাকফ বিধেয়কখন গৃহীত কৰাৰ বাবে সমৰ্থন ভোটৰ সম্ভাৱনাৰ বাবে শাসকীয় বিজেপিয়ে আজিৰ দিনটোত সকলো বিজেপি সাংসদকে উপস্থিত থাকিবলৈ হুইপ জাৰি কৰিছে। একেদৰে কংগ্ৰেছও সকলো সাংসদকে নিম্ন সদনত উপস্থিত থকাৰ নিৰ্দেশৰে হুইপ জাৰি কৰিছে। ইণ্ডি এলায়েঞ্চেও মঙলবাৰে বিয়লি ৱাকফ সংশোধনী বিধেয়কখন বিৰোধীতাৰ বাবে মিত্ৰজোঁটত থকা দলসমূহে যুটীয়া বৈঠক পাতি ৰণনীতি প্ৰস্তুত কৰিছে।
উল্লেখ্য যে, ৱাকফ হৈছে মুছলমানসকলৰ পৰা দানসূত্ৰে সংগ্ৰহ কৰা সম্পত্তি।এই সম্পত্তি মুছলমান সম্প্ৰদায়ৰ উন্নয়ন আৰু কল্যাণৰ বাবে ব্যৱহাৰ কৰা হয়। ৱাকফ সম্পত্তিৰ ধনেৰে পৰিচালিত হয় মছজিদ, কবৰস্থান, অনাথ আশ্ৰম আদি সকলো।
১৯৫৪ চনত দেশত প্ৰথমবাৰৰ বাবে ৱাকফ আইন গৃহীত হৈছিল। ১৯৯৫ চনৰ ৱাকফ আইনৰ সংশোধনী আনিবলৈ অনা হৈছে এই বিধেয়কখন।
ইফালে মুছলিম পাৰ্ছনেল ল’ ব’ৰ্ডে বিৰোধিতা কৰিছে এই বিধেয়কৰ। ব’ৰ্ডৰ সদস্যৰ মতে, এই বিধেয়কে নিঃশেষ কৰিব মুছলমানৰ অধিকাৰ। মুছলিম পাৰ্ছনেল ল’ ব’ৰ্ডে দাবী কৰিছে যে, সংখ্যালঘুৰ মৌলিক অধিকাৰ নোহোৱা কৰিব এই বিধেয়কে। দাবী অনুসৰি, এই বিধেয়কৰ জৰিয়তে ৱাকফ বৰ্ডৰ সম্পত্তিত মুছলমানৰ আধিপত্য নাথাকিব।
কেন্দ্ৰীয় মন্ত্ৰী কিৰেণ ৰিজিজুয়ে লোকসভাত কয় যে, এই বিধেয়কক লৈ চলিছে বহু অপপ্ৰচাৰ। এই বিধেয়কে সংখ্যালঘুৰ অধিকাৰ নিঃশেষ নকৰে বুলি দাবী কেন্দ্ৰীয় মন্ত্ৰীগৰাকীৰ।
