আজি শাৰদীয় দূৰ্গা পূজাৰ মহাষ্টমী। ৰাজ্যৰ সৰ্বত্ৰতে চলিছে উৎসৱ মুখৰ পৰিবেশ। ব্যতিক্ৰম নহয় মধ্য অসমৰ প্ৰান কেন্দ্ৰ নগাঁও জিলাও। সৰ্বসাধাৰণে কোনো অসুবিধা সন্মুখীন নোহোৱাকৈ পৰিয়াল, আত্মীয়ৰ আৰু বন্ধু বৰ্গৰ সৈতে পূজা উপভোগ কৰিবলৈ দিনে নিশাই নিজৰ কৰ্তব্যত ব্যস্ত থাকে আমাৰ নিষ্ঠাবান আৰক্ষীৰ লোক সকলে। উৎসৱৰ বতৰতো নিজৰ মৰমৰ পৰিয়াল- পৰিজনৰ পৰা আঁতৰত থাকি নিষ্ঠাৰে জন সাধাৰণৰ সুৰক্ষাৰ স্বাৰ্থত কৰ্তব্যত নিয়োজিত যান-বাহন শাখাৰ আৰক্ষী সকলক সম্বৰ্ধনা জ্ঞাপন কৰা লগতে লঘু আহাৰ বিতৰণ কৰি প্ৰেৰণা যোগায় নগাঁৱৰ সমাজকৰ্মী তথা সাংস্কৃতিককৰ্মী পাৰ্থ প্ৰতিম মহন্তই। জিলাখনৰ জয়শ্ৰী চিনেমা হল চাৰিআলিৰ, নগাঁও ক্ল’কটাৱাৰ, হয়বৰগাঁও আদিকে ধৰি চহৰখনৰ বহু কেইটা চাৰিআলিত কৰ্তব্যত নিয়োজিত আৰক্ষীক একোখনকৈ গামোচা আৰু মিঠাই টোপোলা প্ৰদান কৰি সন্মান জনায় পাৰ্থ প্ৰতিম মহন্তই।
